സ്റ്റേറ്റ് എക്സൈസ് എൻഫോഴ്സ്മെന്റ് സ്ക്വാഡ് സർക്കിൽ ഇൻസ്പെക്ടർ ടി അനികുമാറിന് ലഭിച്ച രഹസ്യ വിവരെത്ത തുടര്‍ന്ന് രാത്രിയിൽ വാളയാർ ഭാഗത്തു നടത്തിയ പരിശോധനയിൽ മാരകായുധങ്ങൾ അടക്കം 178.4 കിലോ കഞ്ചാവ് പിടികൂടി. കഞ്ചാവ് കാറിൽ ആന്ധ്രായിൽ നിന്ന് കാറിൽ കടത്തികൊണ്ട് വന്ന എറണാകുളം കുന്നത്തുനാട് താലൂക്കിൽ വെങ്ങോല വില്ലേജിൽ തണ്ടേക്കാട് ദേശത്തു പുത്തൻവീട്ട് പറമ്പിൽ ബിനു എന്ന മുഹമ്മദ്‌ ബിലാൽ, ഈ വാഹനത്തിന് അകമ്പടി വന്ന തൃശ്ശൂർ പഴയന്നൂർ കല്ലേപ്പാടം പന്തളംകുണ്ടു വീട്ടിൽ അഭിജിത് എന്നിവരെയും രണ്ടു കാറുകളും സാഹസികമായി പിടികൂടുക ആണ് ഉണ്ടായത്. ആലുവ സ്വദേശി അറാഫത്ത് എന്ന ആളുടെ സഹായികൾ ആണ് ഇവർ എന്ന സൂചന സ്‌ക്വാഡിന് ലഭിച്ചിട്ടുണ്ട്.
കാറുകളിൽ നിന്ന് വാളുകൾ സഹിതം മാരകായുധങ്ങൾ കണ്ടെടുത്തു. ഇത്തരത്തിൽ നേരത്തെയും കഞ്ചാവ് കടത്തിയിരുന്നതായും പ്രതികൾ സമ്മതിച്ചു. പാർട്ടിയിൽ സ്റ്റേറ്റ് എക്സൈസ് എൻഫോഴ്സ്മെന്റ് സ്ക്വാഡ് തലവനായ സർക്കിൾ ഇൻസ്പെക്ടർ ടി അനികുമാറിനെ കൂടാതെ സർക്കിൾ ഇൻസ്പെക്ടർ ജി. കൃഷ്ണകുമാർ എക്സൈസ് ഇൻസ്‌പെക്ടർമാരായ ടി.ആർ.മുകേഷ് കുമാർ, കെ.വി വിനോദ്, എസ്.മധുസൂദൻ നായർ ,പ്രിവന്റീവ് ഓഫീസർ പ്രജോഷ് കുമാർ, സിവിൽ എക്സൈസ് ഓഫീസർമാരായ പി.സുബിൻ, വിശാഖ്,ഷംനാദ്, രാജേഷ് ആർ, മുഹമ്മദലി, അരുൺ കുമാർ എം എം ബസന്ത് കുമാർ, ഡ്രൈവർ രാജീവ്‌ എന്നിവർ ഉണ്ടായിരുന്നു. തുടർ നടപടികൾക്കായി പ്രതികളെയും തൊണ്ടി സാധനങ്ങളും, കേസ് റെക്കോർഡ്കളും പാലക്കാട് എക്സൈസ് റേഞ്ചിന് കൈമാറി.